Hngakchia Nih An Nun In An Cawn

 A tanglei ka rak langh ter mi hngakchia an than lio ah  zeitihdah nun an cawn timi hi kum 2010 hrawnghrang(a nithla ka chinchiah kho deuh lo)ah Zion Darkhing cazual ah ka rak rel i hmailei caah san a tlai te lai tiah ka diary ah kaa tial mi asi. Rampi pakhat thanchonak le lianngannak caah a dingfel mi mino kan herh . Cubantuk mino hna tampi hringsor kho dingah cun cawnpiak tu nu le pa, saya ,sayamah te nih zeitindah kan cawnpiak hna timi hi i zohthan a hau.

A zulh awk a si mi lam kha hngakchia cu cawnpiak law a upat tik ah a pial tak ti Lai lo. (Phungthlukbia 22:6)

Bawipa sin in  hmuh mi ro vialte lak ah a sungbik a si mi fale cawnpiak ning ah hin, Nu le Pa hna  i ralrin ngaingai a herh ko.Hmur le ka in cawnpiak hna leng ah  tuahsernak hrimhrim in cawnpiak an rak herh hringhran. Roorkee sianginn i kan sayapa nih cun "Lam ding kan hmuh sak khawh ttung hna lo ah cun fale hi hrin lo ah a ttha deuh. A ruang cu, hell ram tla ding i kan hrin hna khi a si ko" a rak ti. Cu nih cun khua tam tuk a ka ruah ter.

Hngakchia thinlung cu a ttha,a thianghlim. Cu ruangah cun pei kan bawipa Jesuh Khrih zong nih Vancung pennak cu hi bantuk hngakchia hna ta hi a si a ti kha. Cu bantuk i an thinlung a ttha mi le a thianghlim mi hngakchia nih nifatin an hmuh an ton mi "NUN" kha an rak i cawn i an i tthan pi.

Hngakchia cu;

"1. Soiselnak lak ah atthan ahcun

     Mi sualphawt duhnak a cawng 

2. Sikvelhnak lak ah atthan ahcun

     Mi he i sikvelh a cawng

3. Nihsawh serhsatnak ah a tthan ahcun

     Ningzah nun a cawng

4. In tuar khawhnak lak ah a than ahcun

   Mah le mah i zuamnak le bochan khawhnak nun a cawng

5. Thangtthat conglomh thiamnak   lak ah a tthan ahcun

   Midang thangtthat le conglomh thiamnak nun a cawng

6. Duhdanh um lo nak hmun ah atthan ahcun

  Dinnak a cawng

7.Hnangam lungdaihnak hmun ah a tthan ahcun

   Mah le mah i lunghmuihnak nun a cawng

8.Na hman tiah hnatlak pinak hmun ah a tthan ahcun

   Mah le mah i zumhnak nun a cawng

9.Cohlan le hawikomh thiamnak hmun ah a tthan ahcun

   A nunchung 'DAWTNAK' nun a cawng" tiah ti a si.