Switzerland ram: Lungthin a la mi tete

Khualtlawn a huam taktak mi pakhat nih vawleicung ram vialte lak ah ram nuam bik pakhat a simi Switzerland ram i Short Term course (caantawi cacawnnak) ka hmuh cu, ka cacawn ding nakin a ram va hmuh lai kaa ngaih deuh tining law ka palh lai lo.

Zurich khuachung

Switzerland ram zarh thum ka um chung ah ka lung chung i a taap tuk mi tete lakah pahnih ka cher lai. Catial thiam kan pa le tampi nih Switzerland ram a thatnak le a nuamhnak, an ramkhel ning le an i uk ning cu an tial dih ngawt cang ko caah ka lung a ka sumi tete le Lairam ah kan tuah khawh ve ko mi thil tu ka rak tial lai. Visa buaibai pah he thlathum ka caam chung ah Europe ram, ram 4 ka phan kho.

Switzerland

Lucerne khua ah sianginn kai ding ka si caah Zurich Airport in Lucerne khua lei ah tlanglawng in ka va choi. Switzerland ram ah hin Swiss-German holh an hmang nain mitam deuh cu mirang holh in chonh khawh an si. Ka lung a ka laa mi hna cu:

hmunthurpung@Lucerne tlanglawng dinhnak hmun

(1) Ka phanh le cangka ka hmuh colh mi cu hnawm pung (hmunthur hlonhnak) a si. Cu an hnawmpung cu khan li ah an dal i pakhat ah caku hlonhnak, pakhat ah plastic hlonhnak tibantuk in an dal i thur kha duhnak poah ah hlonh awk a tha lo. An dalmi ning te khan hlonh a si. An khua le an ram hi khuaruahhar ding tluk in a thiang i Delhi ah kum caansau pi a um mi ka caah cun a mit a rak caw i khua a hmu kaa mi bantukin ka lung zong fim dih beh seh law a lo.

(2) Zarh thum ka um chung ah Switzerland ka uar chinchin nak cu an khuachung ah tar tam tuk ka hmuh hna-kum 60, 70 cung upa tam tuk zaangtho (active) tuk in an chawhvahmi ka hmuh pengmi nih ka lungthin a nuamh ter khun. Cu lawng silo in aa chokmi bus ngan pipi, bus dinhnak hmun (bus stop) i an dir tik ah cu bus pipi cu tar nu, tar pa le lamkal a harhmi (a zengmi tbk.) wheelchair cung thumi hna caah vuuu ... tiah a hung niam i fawi tein an kai kho. Bus tumnak an phanh in vuuuuu.... tiah a niam than i fawi te le zaangdam tein tum kai khawh a si.

*Kan khua le kan ram i a um mi kum upa mi, tar dawt le zohkhenh hi kan Bible hrimhrim nih a kan cawnpiakmi a si.

Switzerland ram mi nih zeitlukin dah an ram thiang seh ti an duh tiah cun hmai i a kalmi pakhat khat nih an thil einak hmunthur hlonh hna seh law, a hnu i a kal mi (tar a si zong ah) nih an cher i hmunthur hlonhnak ah tha tein an hlonh. Cu nih cun ka lung a ka suk ngaingai...

Mah Bus hi Lucerne khua i a um mi kanmah Laimi Florina Tumkai umnak lei a kal mi a si

Rampi pakhat thanchonak ah hin cozah a that lawng a zaa lo tihi fiang tein ka hmuh. Rammi vialte nih kan ram hi a dawt in kan dawt i kan dawtnak zong kan tuahsernak ah a langh hrimhrim lawng ah ram thangcho kan si ve te hnga...

Norway ram i ka hmuhton mi zong a tawinak in ka tial than te lai.