NORWAY RAM : Hmuhtonmi

Switzerland ram ah zarhthum chung sianginn ka kai hnu ah kum tampi ka hmuh ti lo mi ka u le, le ka chungle tlawn ding in kaa thawh. Basel Airport in ka zuang i Schiphol Airport, Amsterdam, Netherlands ah suimilam pahnih fai kaa dinh hnu ah Kristiansand Airport, Norway ah dam tein ka va phan. Caan sau pi hmuh le ton ti lo mi ka chungle he kan i ton cu kan i lawmh tuk ah hin kan i lawmhnak a chim zia zong kan thiam lei lo.

America, Germany le Netherlands tbt khi tlawng ning law ka phanh hlan in ka kal duhnak, ka siaherh mi hmunhma, ka zoh duhmi vialte kaa theih cia ko nain Norway ram cu a zei kong hmanh ka rak rel bal mi a si lo tik ah a poh in ka va poh mi bantuk khi a si. Ka kal duhnak hmun le hma zong ka hngalh lo caah ka chungle nih anmah an siaherhnak hmun tete tu ah a kan kal pi. Preikestolen ah ka ngakchiat ten ka thang timi ka nephew, Benny he kan kal.

Preikestolen tlang

Preikestolen( the pulpit Rock)

 Preikestolen lungtlang  cung in khua ka vun cuanh cu Pathian thilser khuaruahhar a rak sining kaa fiang chinchin. Hi tlang hi vawleicung khualtlawng mi tourist nih Norway ram i an zoh duh bik mi pakhat ah aa tel mi a si. Tlang a um tuning hi biakinn i thawngtha chim tik i kan hman mi pulpit bantuk te khin a hlei a fong mi te a um i rili zawn( sea level) in meter 270 a sang. Kumkhat ah buaktlak in minung 300,000 nih an kainak hmun a si. November thla 7-9 tiang vawleicung lemcang minthang Tom Cruise nih "Mission Impossible 6" timi zukcawl aa thlak caah midang kai onh an si lo.Norway ram a um mi le a phan mi nih cun kai hrimhrim awk a si tiah ka ruah.

pulpit rock

Norwegian Petroleum Museum

Preikestolen tlang in kan kir lei ah Stavanger khua um, siibawi cawng lio mi ka upa Joseph nih a ka kalpi.Hi Museum ka hmuh hnu in hin Norway ram kong rel hram kaa thok. Norway ram a rum nak, phaisa a luhbiknak hi zinaan(oil) le ngatlaihnak in a si. An ram ka uar biknak cu a ram le a mipi caah phaisa a hmanning hi a si. Ngatlaih, ngazuarnak in le ngunkhuai in a lut mi phaisa kha cozah nih hman khawh mi budget ah an chiah i cu chung cun ngandamnak caah siseh, fimcawnnak caah le lam le sul tuahnak caah an hman. Zinaan in a lut mi phaisa tukha cu ram dangdang an coih hna i an cawih mi hna in kumkhat ah an hmuh mi a karh (interest) 4% lawng kha cozah nih hmankhawh mi ah an chiah. Zinaan in phaisa lut mi chungin a karh lawng an hman caah a phaisa pum cu a ningpin a um ko tinak si. Zeizat liangluang dah a va si hnga mu. Cu an chiah ko mi an phaisa hmannak ding an timhlamh ning hrim nih hin mi pipa an sinak a langh ter.  Cucu zeitindah a si tiah cun kan techin fapar hna chan , chan tampi tiang ram rum le ram tha kan si nak hnga tiah an i khon ko. Kan ram he cun a va i dang hringhran dah.

@Norwegian Petroleum Museum

Ram dangdang in um cun i siaherh cio a si. Norway ram eidin thawthaw deuh ka ei hmanh ah Lai lei ka chungle nih tep ve hna seh law ti lawng te ka ruat. Thlahnih dengmang caam hnu zongah ka kal taak ding mi ka chungle ka vuai hoi hna lo.

kawlram lei kir ni ah chungkhat, unau cheukhat he

Norway ram bang kan ram vawleitang in a chuak mi sui le ngun, lungvar hna le zinaan hna hmang in hin ram mi dawtnak lungthin taktak he riantuan mi cozah rak ngei usih law zuun i ngaih a tlawm deuh suaumau hnga i Norway ram ah hin Laimi hi zatzat hi an rak pem lem hnga lo mu.............