Mitha an rak tampi ko!
Ramleng cu chim lo ramchung hmanh
ah khual tlawng bal theng lomi na hei si. Ramchung cu chim lo Laitlang hmanh ah
na phanh balmi khuapi deuh cu Hakha le Falam lawng a va si rih. Ramleng kal naa
thawh, phanh bal lonak mi khua le mi ram i zei hngal set lo in va phanh,
herhhai cawk ruah ah leng ka chuak ti i lam va tlau chap beh! “Hi inn pi hi ka
rat pah ah khan ka hmuhmi lo ko eh” ti pah zongah cu bantuk inn nih le a tam
emem. Suimilam cheu leng i chawh len zongah a hmun theih ti lo, aa chawklet mi
hal len hna ah mirang holh thei lo na, a thei mi nih a hmun thei lo lawngte.
Lungretheih si, thinphan si, sim card le i cawk manh rih lo, oiii, a pit in a
pit ko. Cu lio te i kum 50 leng si cangmi upa pakhat na pawng teah rak ra in “kafa,
khoika dah kal na duh?” tiah hmaipanh tein an rak chonh. Na umnak address cu na
hei hmuh ter. Taxi mawngmi a si caah a duh ah cun hlen chukcho khawh na si
cumu! Nain, “hi ka lam te hin hei pial law lam donghnak tiang kal law naa
thumhnak hotel a um ko lai” anti. A cutluk lungretheih lio i an rak bawm tu kha
hngalh bal cu chim lo, na hmuh balmi zong si lo, vawleicung ah a rak sem ve le
sem ve lo hmanh na hngalh mi si lo!
Nikhat cu kawlram he a hlat
ngainak ram lei ah na kal, Europe va ti ko usih! Na mirang holh thiampah mi te
kha hman khawh a si cang kan ti lai. French embassy in Schengen visa na ngah
caah Europe ram, ram 27 ah naa chawk kho cang cumu! (German Embassy in visa sok
cun kal khawhnak ram a tlawm deuh). Europe ah cun laimi na chungkhat an tampi
cang, cucaah, na chungle tlawn ruahah na phanh hmasabik nak ram in an umnak ram
lei na zuan ah khan direct flight in siloin ram pakhat ah vanlawng naa thleng
(transit).
Naa cit dingmi na vanlawng sau nawn hngah a hau, McDonald na va ei
ta. Cu dih cun zunput ah na va kal. A thluak tlau ngaimi le thil philh hmang
takmi na si caah zunput chungah na phone na va philh ai!! Sinain, na philh le
philh lo zong naa hngalh lo, na kal thluahmah ko.
Na kal hnu tlawmpal ah khin
mirang nu, aa dawh tak mi te nih an rak dawi i “Miss, mah hi nangmah phone si
ma?” an rak ti. Na ngeihnak hmanh sau rih lo mi phone, na chungkhat nih US in
an rak in kuat kaa mi te khi si cumu, thlau beh law cu na ngeih khawh than colh
ti lo ding phun khi. A cu mirang nu fel cu dah, a muidawh te he. Na thlau beh
ding khi na ruah i na ruah pah khin na lau chinchin mi khi hei ruat hmanh!
Lucerne, Switzerland (2017) |
A caan lio teah i bawmh mi cu
hleihlak kai pah i an thil tomkhat kan chaan mi hna hmanh khi a sunglawi tuk
ko. Kan nunchung ah hin kan bawmh peng mi minung theng nih khin a kan bawm kho
lo men, nain, na hmuh ballo mi minung sin zongin a rak kir ko lai dahkaw!!
Note: May God Bless that taxi
driver I met on a road in Bangkok (2013) and that beautiful girl who gave back my mobile phone at Schiphol airport, Amsterdam, Netherlands. I know I’ll
never meet them again, or won’t remember their exact faces even if given chance
to meet them later. But, I say “May God Bless You abundantly” whenever the
thought comes into my mind.
Comments
Post a Comment