Mah Le Mah i Hmuh

Zingka sik te ah inn hmai lei in,

“Hmakphek cawk nan duh lai lo maw?” tiah a upa ngai cangmi nu pakhat aw ther nawn tein a au thawng cu coka in ka theih. Meipung toh pah, ka sirlei thutdan cungah ka chiah mi coffee hrai ka laak i ka chem pah khin ka lung chungah biahalnak tam tuk a ra.

Ka hni venhmi that le that lo ka zoh ko hih 😜

Ziah kei hi inn chungah ka thut ko?

Ziah kei hi meipung toh pah in coffee ka din cuahmah ko?

Ziah hmakphek zuar nu hi hmakphek a zuar?

Zei ruangah dah kei innchung ah ka duhmi te ka tuah i anih khuasik lak ah hmakphek a zuar?

Kan zeidah aa dang?

Ziah anih khi innchungah a tthumi si i kei hi hmakphek zuarmi ka si lo?

Ka lung a buai dih cikcek.

Coka ah kapa a hung luh le cangka in,

“Pa, Pathian hi a um lo” ka hun ti colh. Kapa nih ar ko in sau nawn a ka zoh hnu ah ka lungchung i aa tuaimi vialte ka chimh dih. Kapa nih a theihmi Bible caang vialte le thawngtha a ngaih balmi vialte in a ka cawnpiak. Ka lu ka suk len ko nain ka cohlang kho lo.

Ziah ramdang vial khi tluk khin a tthat hna i Kawlram silole Laitlang vial hitihin kan si. Uknak that lo ruang kan ti, ziah uknak cu Pathian nih a tthat ter kho lo maw? Pathian nih a kan hmu ko hnga lo maw? Pathian hi thleidannak maw a ngeih?

Pathian hi a um tak lo i si ko lai timi a hung chuak.

Tlawmpal ah messenger ka hun on, ka upa pakhat nih “Sapiens” timi cauk kha rel ka duh tak tiah ca a ka kuatmi ka hmuh. Google ah cauk review (carel tu an hmuhning kan ti lai cu) ka va zoh colh. “Minungphun” kong Hebrew University of Jerusalem ah professor ttuan lio mi Yuval Noah Harari nih tialmi si. Rel ve hrim hau!

Ramleng ka chuah hmasabik ah laksawng phorh dingin cauk cu ka cawk. A zaanah ka um kho lo i ka phorhmi nih a rel hlanah rel ko ning tiah ka rel. Kan hmuhning aa dang dih cio lai nain kei nih cun a cauk ka rel dih hnu ah “Pathian hi a rak um lo hi ta” tiah a phi ka chuah.

Nikhat, nihnih, zarhkhat, zarhhnih cu ka Okay ngai ko.

Caan a hung rau deuh, zeidik a baumi khi a um pah thluahmah.

Kan hnu lei ka blog ah ka rak ttialmi, “Nangtah zeitindah naa thlen?” timi a rel cangmi caah cun nan theih cia si lai. A zaw bal bak lomi biatak tein ka hung zaw, ka pum (physical) dam lo nak in ka thinlung (mental) lei a si tikah sau ngai a ka kuah. Cuti ka zawt hnu ceo cun Pathian ka rak herh tuk ning fiang tein kaa theih tthan.

Tukum chungah kaa timhmi zeihmanh a tlamtlin ttunglo. Europe silole America ah Scholarship in ca ka cawnglai ka timi zong a tlamtlin ttunglo. Zeihmanh a tlamtling lo, kaa timh ningin zeihmanh a kal ti lo. Ka lung a dongh cikcek hnu ah kaa fianmi cu “Pathian nih a ka kingh” ti hi a si.

Amah ka hmuh khawh nak hnga ding le keimah le keimah kaa hmuh khawhnak ding ah zawtnak le sungh zatlaknak ka ton hi a si ko hih!

Kei cu 2018 chungah keimah le keimah kaa hmu. Cun, a ka daw taktak tu fiang tein ka hngalh hna.

A nun in a ka cawnpiak tu Kanu na cungah kaa lawm tuk.

Kapa le a fale caah thluachuak Nu nasi.

 Note: Zawtnak le sungh zatlaknak vialte chung zong in hin, 2018 cu “thluachuah ka hmuhbik kum arak si” tiah hihnu kum hnih ah ka chim te hrim lai ☺…… dam ten um cun……………..

Bia ralkah pi khin 2018 chungah a ka inspire bakmi pawl,

Ka uar bikmi married couple cu U Ling le U Hniang,

A riantuan ning ka uar bikmi cu U Biak (Salai Van Biak Thang),

A thawngtha chim ka ngaih bikmi Rick Warren hna ansi.